Hökumət milləti və millətin vəkilini eşitməsə... - Zahid Oruc Bakının xilas yolunu göstərdi

Bakıda demaqrofik vəziyyət partlayış həddindədir. Urbanizasiya problemi indi ən faciəvi şəkildə özünü göstərməkdədir. Son həftələr şəhərdə tıxacların anormal və dözülməz həddə çatması artıq hamını dilə gətirib. İndi ölkənin tanınmış adamları - xalq artistləri, tanınmış aparıcılar, sosial media fenomenləri sadə insanların çəkdiyi işgəncələrdən danışırlar. Lakin əsas məsələ təkcə tıxaclardan cana doymuş əhalinin dərdini danışmaq deyil, həm də çıxış yolu göstərməkdir.

Baxın, bu günlər ərzində çox narazılıqlar eşidildi, haqlı tənqidlər səsləndi, amma az sayda mütəxəssis və ya siyasət adamı çarə təklif etdi. Onlardan biri isə parlamentin İnsan Hüquqları Komitəsinin sədri Zahid Orucun oldu.

Anaxeber.info.az yazır ki, istər televiziya kanalları, istərsə onlayn media platformaları, istərsə də sosial şəbəkələrin Azərbaycan seqmenti Zahid Orucun İnsan hüquqları komitəsinin  iclasındakı çıxışını yayır. Çünki Zahid Oruc həm əhalinin "ürəyindən tikan çıxaran" həqiqətləri açıqladı, həm də çıxış yolu göstərdi - bəli, Bakıda tunel tikmək yox, əyalət adamlarını yaşadıqları doğma yerlərinə qayıtmağa təşviq etmək. Bəs bu necə həyata keçiriləcək? Zahid Oruc hökumətə yol da təklif etdi - elektrik enerjisinin tarifini üç dəfə azaldacaqsan. Kənddə qaz mövcuddursa, onu üç dəfə azaldacaqsan. Bu, büdcə üçün böyük bir itki yaratmır, əksinə Bakıda tunelə və yaxud da o əhalinin məskunluğuna çəkilən xərclər bundan bir neçə dəfə artıqdır. İpotekanı bölgələrdə verəcəksən, emal müəssisələrinə sıfır vergi siyasəti aparacaqsan, müəllimlərin, həkimlərin ödənişlərini bir neçə əmsal artıq verəcəksən. Vətəndaş kənddə yaşamağın üstünlüyünü, cazibəsini hiss edəcək, bu dünyada keçirilmiş yoldur. Əgər poçtu, tibb məntəqəsini bağlayırıqsa, məktəb də bu gedişatla bağlanmaq vəziyyətində qalırsa, o halda kəndin özünün varlığı sual altına düşür.

Vəssalam, millət vəkili çoxdan hamının demək istədiyini bəyan etdi. Burada hökumətə faydalı təkliflər var. Komitə sədri deyir ki,  sözügedən güzəştlər təkcə şəhərdən kəndə qayıdan əhalinin güzəranını yaxşı etməyəcək, həm də büdcə üçün əhəmiyyətlidir. Çünki tunel tikintisinə gedən xərclə kəndlinin qazına, işığına edilən imtiyaz arasında ciddi fərq var, ikincisi, daha az məsrəf tələb edir. Üstəlik, Zahid Oruc bu təklifləri səsləndirməklə yanaşı, prezident İlham Əliyev bu ilin mayında Prezident İlham Əliyev kənd təsərrüfatı məsələlərinə həsr olunmuş müşavirədə həm problemi gündəmə gətirmiş, həm də çağırış etmişdi. 
Dövlət başçısı həmin müşavirədə bildirib: “Biz isə elə etməliyik ki, kəndlərdən şəhərlərə yox, şəhərlərdən kəndlərə qayıdış prosesi başlasın. Bunun üçün də əlbəttə ki, kəndlə şəhər arasındakı istənilən istiqamətlər üzrə fərqlər azaldılmalıdır”.

Bu qədər sadə. Amma hökumət şəhərdən kəndə qayıdış üçün heç bir proqram həyata keçirməyib. Nəticəsi də göz qabağındadır: Bakı tıxacların cəngində can verir. Və köklü dəyişiklik olmasa, bu gedişlə şəhərdə vəziyyət daha da absurd həddə çata bilər.

O baxımdan, komitə sədri Zahid Orucun irəli sürdüyü təkliflər iclasda deyilib, iclasda da qalmamalıdır. Hökumət həm prezidentin müşavirədə çağırışlarını, həm deputatın yenidən gündəmə gətirdiyi bu problemin həlli üçün çırmanmalı, real işlər həyata keçirməlidir. Əks halda, metronun iki stansiyasına girişi pulsuz etməklə, ekspress avtobusların təşkiliylə, yaxud dəyişkən iş rejiminin tətbiqi hesabına fundamental nəticələr əldə etmək mümkün deyil. Hökumətin işi milləti və millətin vəkilini dinləməkdir. Millətin də parlamentdə sözünü deyən azsaylı vəkillərindən biri Zahid Orucdur. Onun sözlərinin yanından ötüb keçmək yalnız problemin getdikcə dərinləşməsi demək olacaq. Ona görə də elə indi başlanmalıdır, əslində gecdir, amma zərərin yarısından qayıtmaq  faydalıdır. Milləti də, millətin vəkilini də eşidin, Bakını tıxac işğalından azad edin!

Azər Talıbov